ශ්‍රී ලංකාවේ අපරාජිත ගමන සිම්බාබ්වෙන් නවතියි

විස්සයි20 ලෝක කුසලාන ක්‍රිකට් තරගාවලියේ මූලික වටයේ ශ්‍රී ලංකාව සහභාගි වූ අවසන් තරගයෙන් සිම්බාබ්වේ කණ්ඩායම හමුවේ කඩුලු 6ක පරාජයක් ලැබීමට අද (19) ශ්‍රී ලංකාවට සිදුවිය.

මෙම පරාජයත් සමඟ තරගාවලිය පුරා මෙතෙක් ශ්‍රී ලංකාව රැකගෙන සිටි අපරාජිත බව ද බිඳ වැටුණි.

කොළඹ ආර්. ප්‍රේමදාස ක්‍රීඩාංගණයේ පැවති මෙම තරගයේදී පළමුව පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 20 අවසානයේ කඩුලු 6ක් දැවී ලකුණු 178ක් රැස් කළේය.

ලකුණු 179ක ඉලක්කයක් හඹාගිය සිම්බාබ්වේ ක්‍රීඩකයෝ පන්දුවාර 19.3කදී කඩුලු 4ක් පමණක් දැවී ජයග්‍රහණය වාර්තා කිරීමට සමත් වූහ.

මෙම ජයග්‍රහණයත් සමඟ සිම්බාබ්වේ කණ්ඩායම පිරිමි විස්සයි20 ලෝක කුසලාන ඉතිහාසයේ මූලික වටයේ තරග 3ක් ජයගත් පළමු අවස්ථාව ලෙස වාර්තා අතරට එක්විය. ඔවුන් ‘B’ කාණ්ඩයේ ප්‍රසාද ලකුණු සටහනේ පෙරමුණ ගනිමින් සුපිරි 8 වටයට සුදුසුකම් ලබා ඇත.

සිම්බාබ්වේ ජයග්‍රහණයේ නියමුවා වූ බ්‍රයන් බෙනට් නොදැවී ලකුණු 63ක් රැස්කළ අතර, නායක සිකන්දර් රාසා පන්දු 26කදී ප්‍රහාරාත්මක ලකුණු 45ක් (හයේ පහර 4ක් සහ හතරේ පහර 2ක්) රැස් කළේය. පන්දු යැවීමේදී ශ්‍රී ලංකාව වෙනුවෙන් දුශාන් හේමන්ත ලකුණු 36කට කඩුලු 2ක් දවාගැනීමට සමත් විය.

කෙසේ වෙතත්, මෙම තරගයේ ප්‍රතිඵලයට පෙර සිටම කණ්ඩායම් දෙකම සුපිරි 8 වටයට සුදුසුකම් ලබා තිබීම විශේෂත්වයකි. පැතුම් නිස්සංක අද දිනයේ ශ්‍රී ලංකාව වෙනුවෙන් වැඩිම විස්සයි20 ලකුණු ලාභියා ලෙස වාර්තාවක් පිහිටුවුවද, කණ්ඩායමක් ලෙස එම ගෞරවය ජයග්‍රහණයකින් නිම කිරීමට ලාංකීය පිලට නොහැකි විය.