ශ්‍රී ලංකා ක්‍රිකට් වලට අලුත් නියමුවෙක්! විස්තරය මෙන්න

ශ්‍රී ලංකා කාන්තා ක්‍රිකට් ක්‍රීඩාවේ දැවැන්ත නවෝදයක් සනිටුහන් කරමින්, ඉදිරි වසරක කාලය සඳහා ශ්‍රී ලංකා කාන්තා ජාතික කණ්ඩායමේ ප්‍රධාන පුහුණුකරු ලෙස අත්දැකීම් බහුල හිටපු ඕස්ට්‍රේලියානු ක්‍රීඩක ජේමි සිඩන්ස් පත් කර තිබේ.

ලබන මාර්තු මස 16 වැනිදා සිට නිල වශයෙන් සිය රාජකාරි ආරම්භ කරන සිඩන්ස්, ලෝක මට්ටමේ තුන්වන මට්ටමේ (Level 3) සුදුසුකම් ලත් පුහුණුකරුවෙකු වීම විශේෂත්වයකි. මීට පෙර 2007 සිට 2011 දක්වා කාලය තුළ බංග්ලාදේශ පිරිමි කණ්ඩායමේ ප්‍රධාන පුහුණුකරු ලෙස කටයුතු කරමින් එම කණ්ඩායම ජාත්‍යන්තර තලයේ ඉහළටම ඔසවා තැබීමට ඔහු සමත් විය.

මෙම නව පත්වීමේ ප්‍රධානතම සහ අසීරුතම අභියෝගය වන්නේ එළඹෙන ජුනි මාසයේ එංගලන්තයේදී පැවැත්වීමට නියමිත 2026 විස්සයි විස්ස කාන්තා ලෝක කුසලානය සඳහා ශ්‍රී ලංකා කණ්ඩායම සන්නද්ධ කිරීමයි. ශ්‍රී ලංකා ක්‍රිකට් ආයතනය බලාපොරොත්තු වන්නේ සිඩන්ස්ගේ සුවිශේෂී උපායශීලී දැනුම සහ අත්දැකීම් උපයෝගී කරගනිමින් මෙවර ලෝක කුසලාන තරගාවලියේදී ශ්‍රී ලංකා කාන්තා පිලට පෙරළිකාර ජයග්‍රහණ කරා මඟ පෙන්වීමයි.