චාමික කරුණාරත්නගේ පීතෘත්ව නඩුවේ නවතම තත්ත්වය මෙන්න

කොළඹ දිසා අධිකරණ නියෝගයට එරෙහිව DNA රුධිර සාම්පල පරීක්ෂාව ඉල්ලා චාමිකට එරෙහිව ඇරඹුණු 2 වැනි නීතිමය සටන

දරුවාගේ උප්පැන්න සහතිකයට චාමිකගේ නම ඇතුළත් කිරීමට රෙජිස්ට්‍රාර් ජනරාල්ට නියෝගයක් ඉල්ලමින් රසිකා සෙව්වන්දි කළ ආන්දෝලනාත්මක ඉල්ලීම

ප්‍රකට ක්‍රිකට් ක්‍රීඩක චාමික කරුණාරත්න සහ ගුවන් නියමුවරියක වන රසිකා සෙව්වන්දි අතර හටගෙන ඇති මෙම නීතිමය අර්බුදය මේ වන විට කොළඹ සිවිල් අභියාචනා මහාධිකරණය හමුවට පැමිණ තිබේ.
2023 වසරේ සිට පැවැති බව කියන ප්‍රේම සබඳතාවයකින් අනතුරුව තමා ගැබ්ගත් බවත්, ඉන් පසුව උපත ලැබූ දරුවාගේ පියා චාමික කරුණාරත්න බවටත් රසිකා සෙව්වන්දි විසින් චෝදනා කරනු ලබයි.

කෙසේ වෙතත්, අදාළ දරුවාගේ පීතෘත්වය භාරගැනීම ශ්‍රී ලංකා ක්‍රිකට් ක්‍රීඩකයා විසින් දිගින් දිගටම ප්‍රතික්ෂේප කර ඇති අතර, එම සත්‍යතාව තහවුරු කරගැනීම සඳහා සිදුකිරීමට නියමිතව තිබූ DNA පරීක්ෂණයකට රුධිර සාම්පලයක් ලබාදීම පවා ඔහු විසින් එකහෙළා ප්‍රතික්ෂේප කර ඇත.

මෙම ගැටලුව මුලින්ම කොළඹ දිසා අධිකරණය හමුවේ විභාගයට ගත් අතර, එහිදී රසිකා සෙව්වන්දි ඉල්ලා සිටියේ චාමික කරුණාරත්නට බලපෑම් කර හෝ DNA පරීක්ෂණයක් සඳහා රුධිර සාම්පලයක් ලබාදීමට අධිකරණ නියෝගයක් නිකුත් කරන ලෙසයි.

නමුත් කොළඹ දිසා අධිකරණය විසින් ඇයගේ එම ඉල්ලීම ප්‍රතික්ෂේප කරමින් තීන්දුවක් ලබා දුන්නේය. එම තීන්දුවෙන් අධෛර්යමත් නොවූ ගුවන් නියමුවරිය, දිසා අධිකරණ තීන්දුවට එරෙහිව කොළඹ සිවිල් අභියාචනා මහාධිකරණය හමුවේ පෙත්සමක් ගොනු කරමින් මෙම දෙවැනි නීතිමය සටන ආරම්භ කර තිබේ. ඇය සිය පෙත්සම මගින් දැඩි ලෙස අවධාරණය කරන්නේ තම දරුවාගේ සැබෑ පියා චාමික කරුණාරත්න බවට අධිකරණය මගින් නීතිමය ප්‍රකාශයක් ලබා දෙන ලෙසයි.

එපමණක් නොව, එම තීන්දුවට අනුකූලව අදාළ දරුවාගේ උප්පැන්න සහතිකය වෙත චාමික කරුණාරත්නගේ නම නිල වශයෙන් ඇතුළත් කර නව උප්පැන්න සහතිකයක් නිකුත් කරන ලෙස රෙජිස්ට්‍රාර් ජනරාල්වරයා වෙත අධිකරණ නියෝගයක් නිකුත් කරන ලෙසද ඇය වැඩිදුරටත් ඉල්ලා සිටියි. 2023 වසරේ සිට ඇරඹුණු මෙම අභිරහස් සහ ආන්දෝලනාත්මක පෙම් කතාව අවසානයේ මෙලෙස මහාධිකරණය දක්වා ගමන් කර ඇත්තේ දෙපාර්ශවය අතර තියුණු නීතිමය තර්ක විතර්ක මතු කරමිනි.

නොමිලේ ක්‍රීඩා පුවත් දැන ගැනීමට සම්බන්ධවන්න 
https://chat.whatsapp.com/FrsLYJeHXPI5egahxbywSQ?mode=gi_t