ජයිස්වාල්ට සහ අසිතට ICCයෙන්හ හදිසි දඩයක් ! විස්තරය මෙන්න

කොළඹ SSC ක්‍රීඩාංගණයේදී පැවැත්වෙන දෙවැනි ලෝක ටෙස්ට් ශූරතාවලියට අයත් තරගය අතරතුර ක්‍රිකට් ලෝලීන්ගේ දැඩි අවධානයට ලක්වූ විශේෂ සිදුවීමක් වාර්තා වෙනවා. ශ්‍රී ලංකා වේගපන්දු යවන ක්‍රීඩක අසිත ප්‍රනාන්දු සහ ඉන්දීය ආරම්භක පිතිකරු යශස්වි ජයිස්වාල් අතර තරගය අතරතුර හදිසියේ ඇතිවූ උණුසුම් තත්ත්වයක් හේතුවෙන් ජාත්‍යන්තර ක්‍රිකට් කවුන්සිලය (ICC) විසින් වහාම ක්‍රියාත්මක වන පරිදි ඔවුන් දෙදෙනාට එරෙහිව විනය පියවර ගෙන තිබෙනවා.

තරගයේ තීරණාත්මක මොහොතක ක්‍රීඩකයන් දෙදෙනා අතර සිදුවූ නුසුදුසු ශාරීරික ගැටීමක් මීට මුල් වී ඇති අතර, එය ජාත්‍යන්තර ක්‍රිකට් කවුන්සිලයේ විනය චර්යාධර්ම පද්ධතිය බරපතල ලෙස කඩකිරීමක් ලෙස සැලකෙනවා. තරගය නරඹමින් සිටි ප්‍රේක්ෂකයින් පවා මවිතයට පත් කරමින් සිදු වූ මෙම සිදුවීම සම්බන්ධයෙන් ICC විනය චර්යාධර්ම පද්ධතියේ 2.12 වගන්තිය යටතේ ක්‍රීඩකයන් දෙදෙනාටම නිල වශයෙන් චෝදනා එල්ල වී තිබෙනවා. අදාළ වගන්තිය මගින් ජාත්‍යන්තර තරගයකදී ක්‍රීඩකයෙකු, තරග නිලධාරියෙකු හෝ වෙනත් අයෙකු සමඟ අනවශ්‍ය ලෙස ශාරීරිකව ගැටීම සම්පූර්ණයෙන්ම තහනම් කර තිබෙනවා.

සිදුවූ වරද සම්බන්ධයෙන් පැවැත්වූ මූලික විමර්ශනවලදී අසිත ප්‍රනාන්දු සහ යශස්වි ජයිස්වාල් යන ක්‍රීඩකයින් දෙදෙනාම තමන් අතින් සිදුවූ වරද පිළිගැනීමට කටයුතු කර තිබෙනවා. ඒ හේතුවෙන් වැඩිදුර දීර්ඝ විමර්ශනයකින් හෝ නිල පරීක්ෂණයකින් තොරව තරග තීරකවරයා විසින් ඔවුන්ට ලබාදෙන දඬුවම නියම කිරීමට පියවර ගෙන තිබෙනවා. ඒ අනුව ඔවුන් දෙදෙනාගේම අදාළ තරග ගාස්තුවෙන් සියයට 25ක දඩයක් පැනවීමට ජාත්‍යන්තර ක්‍රිකට් කවුන්සිලය තීරණය කර ඇති අතර එය මූල්‍යමය වශයෙන් ඔවුන්ට එල්ල වූ දැඩි පහරක් වෙනවා.

මීට අමතරව එම දඩ මුදලට පමණක් නොනැවතී ඔවුන් දෙදෙනාගේම ජාත්‍යන්තර විනය වාර්තාවලට අවාසිදායක ලකුණ (Demerit Point) බැගින් එක් කිරීමටද ICC පියවර ගෙන තිබෙනවා. ඉදිරි මාස 24ක කාලය තුළ මෙවැනි අවාසිදායක ලකුණු එකතු වීම තුළින් ක්‍රීඩකයින්ට ඉදිරි තරග තහනම් වීමේ දැඩි අවදානමක්ද මතුවේ.

නොමිලේ ක්‍රීඩා පුවත් දැන ගැනීමට සම්බන්ධවන්න 
https://chat.whatsapp.com/FrsLYJeHXPI5egahxbywSQ?mode=gi_t