කුසල් මෙන්ඩිස්ගෙන් අලුත් වාර්තාවක්

පාකිස්ථාන සුපර් ලීග් තරග බිමේ සිය ආධිපත්‍යය යලිත් වරක් තහවුරු කරමින් පෙෂාවර් සල්මි කණ්ඩායම නියෝජනය කරන ශ්‍රී ලංකාවේ ප්‍රහාරක පිතිකරු කුසල් මෙන්ඩිස් අතිවිශිෂ්ට ඉනිමක් ක්‍රීඩා කිරීමට සමත් වුණා.

මුල්තාන් සුල්තාන් කණ්ඩායමට එරෙහිව ඊයේ පැවති තීරණාත්මක තරගයේදී පිටිය සිසාරා එල්ල කළ මනරම් හයේ පහර 3ක් සහ හතරේ පහර 6ක් සමඟින් පන්දු 40ක් වැනි කෙටි කාලයකදී ලකුණු 68ක් රැස් කරමින් ඔහු සිය කණ්ඩායම ලකුණු 24ක විශිෂ්ට ජයග්‍රහණයක් කරා රැගෙන ගියා.

මෙම සුපිරි දස්කමත් සමඟින් වත්මන් තරගාවලියේ වැඩිම ලකුණුලාභියා ලෙස පෙරමුණ ගැනීමට කුසල් සමත් වී ඇති අතර ඔහු මෙතෙක් ක්‍රීඩා කළ තරග 5 තුළදී එක් ශතකයක් සහ අර්ධ ශතක 2ක් ඇතුළුව ලකුණු 309ක් ලබාගනිමින් මුළු ලෝකයේම අවධානය දිනා ගැනීමට සමත් වී සිටිනවා. මෙම අසමසම දක්ෂතාවය හේතුවෙන් පී එස් එල් තරගාවලියේ වඩාත්ම භයානක පිතිකරුවා ලෙස මේ වන විට බොහෝ දෙනා ඔහු හඳුන්වනු ලබනවා.